其實唔算係咩成功生意，但呢幾年人生真係充實好多，又見有朋友成日驚創業風險，所以想分享一下自己嘅經驗…
我本身係做設計嘅，但同時又鐘意影相，所以得閒會接下freelance，但促使我去創業原因係舊老闆對員工越黎越差，由當時開始我就積極儲錢同接唔同嘅影相job，無錢嘅都會盡量接，務求要令自己可以學到更多野，終於係四年前辭職，拎住十萬去打天下，開公司，Home Office，不過第一年係好難捱…有四個月基本上零收入，但我無放棄過，將之前影過嘅相搞好個網站，等人一問起就即刻可以有作品俾人睇。
第二年開始，生意慢慢穩定，由於我性格比較開朗，識嘅野比較廣泛，好多生意客戶都係由傾下興趣慢慢轉去傾我嘅工作，而本身我朋友比較多，有唔少生意都係由朋友介紹過黎，而我好著重branding，所以一開始已經有晒自己嘅公司簡介、卡片、公司恤衫等等，客戶們都覺得我公司好專業，以為係大公司，當然其實無人知係One man band啦，就咁樣開始左第一個長期合作嘅公司客戶，當然第一次上去開會係好驚，但只要做足資料搜集，開會個陣主動發言，將主動權掌握在手，客戶就會更同意你嘅意見，而且呢個客戶係一間中型銀行，而就係咁我請左第一個同事幫我手…
由第一個客開始，我可以話俾我班潛在客戶聽我其中一個客係銀行，令佢地對我有更大信心，但呢幾年當然係要唔怕蝕底咁付出，同某幾間公司合作初期，我係以免費方式打動佢地，慢慢地係佢地同事之間建立口碑，然後就將大部分攝影工作交俾我，當然中間一定會有幾單免費去幫佢地做嘅野，但做生意嘅係講長期合作關系，唔係下下講錢…
到第四年嘅今日，雖然無上市…人手都唔多，但我嘅長期客戶已經有銀行，大型時裝公司、藝術機構、大學、政府、皇宮、大地產商、美容公司等等…人工亦由第一年嘅慘淡，到而家每個月有穩定增長收入，仲可以請埋人幫手，而且每日會覺得有好多新挑戰，其實創業可以過得好快樂！
創業小小分享…
- 唔好怕付出同蝕底，要將每次付出視為學習；
- 要主動去吸取知識，不論時事、車、錶、樓、興趣等等…，同老闆閒談嘅時候起碼可以令佢對你嘅話題有興趣；
- 亦要主動去搵人傾計，唔好怕瘀；
- 將自己嘅工作經驗/作品放上去一個隨手俾人睇嘅地方，好似FB page或網站，如果傾傾下發現個客對你嘅工作有興趣，可以即時分享到俾客人；
- 最重要嘅係，要令客人覺得唔係佢揀服務而係你幫佢度身訂造適合佢嘅產品，咁就更加容易做成生意
http://finance.discuss.com.hk/viewthread.php?tid=25846284&extra=page%3D1
